Ji bo zimanê Kurdî gaveke dîrokî;"Pergela Xebitandinê ya kompîterê Lînux êdî bi Kurdî ye"

02 Berfanbar, 2006

Bi hevkariya Komeleya Pêşxistin û Lêkolîna Çand û Ziman û Şaredariya Sûrê ya Diyarbekirê û , Pergala Xebitandina Ubuntuyê ya Kurdî ya yekem hat amadekirin û resepsiyona danasîna wê hat lidarxistin.

Serokê Şaredariya Bajarê Mezin Osman Baydemîr di resepsiyonê de axivî û Pergala Xebitandina Kurdî wek gaveke dîrokî nîrxand û got; ji bo pêşeroja tevahiya çand û zimanan divê wek pêşketineke mezin bê nirxandin.


Resepsiyona danasîna Pergala Xebitandina Kurdî Linux ya yekem bi navê ‘Ubuntu’ ku bi hevkariya Şaredariya Sûrê û Komeleya Pêşxistin û Lêkolîna Çand û Ziman hatibû amadekirin li Class Otêlê hat lidarxistin. Li gel Nivîskarê Kurd Mehmed Uzun, Osman Ozçelîk, , Serokê Şaredariya Bajarê Mezin a Diyarbekirê Osman Baydemîr, Serokê Şaredariya Sûrê Abdullah Demîrtaş û nivîskar û rewşenbirên ku ji bo Rojên Wêjeyê li Diyarbekirê bûn nêzî 300 kesî beşdar bûn. Li resepsiyonê di destpêkê de Serokê Şaredariya Sûrê Abdullah Demîrbaş mafê axaftinê stend û da xuyakirin ku ji rojeke wiha dîrokî re şahidîkirin û di destpêka wê de ked-dayîn ji bo wan rûmeteke mezin e.

 Demîrbaş da xuyakirin ku ziman ji bo gelekî pêwîstiya hebûnê ye û got; “Ku hûn li qadeke xizmetê dixebitin, ji bo ku hûn bikaribin ji wan mirovan texdîrê bistînin divê ku hûn giramiyê bidin ziman û çanda mirovên wê herêmê.” Demîrbaş da zanîn; “Ku li Diyarbekirê pirçandîbûn hebûya wê aştiya wan çandan jî hebûya” û got; çi wexta ku tenê yekzimanî û pişaftinê dest pê kir wê demê li vî welatî şer jî dest pê kir. Demîrbaş gotinên xwe wiha domand: “Ev gava me bi armanca xebateke pirzimanî û bi hev re jiyînê ye. Heger me bi vê xebatê pîştgirî dabe çanda kurd her bijî ji me re.”


Rojeke Dilşadiyê

Nivîskarê kurd Mehmed Uzun ku demeke li Diyarbekirê tedawiya ‘penceşêrê’ dibîne jî da xuyakirin ku ev pergala xebitandinê ya kurdî ku hatiye amadekirin cihê dilşadiyê ye û got; “Îro rojeke dilşadiyê ye. Ji îro û pêve zimanê kurdî gaveke mezin davêje û di qada ragihandinê de derbasî kompîturê dibe. Zimanê kurdî ku roj bi roj belav dibe bi pêş dikeve, derbasbûna wê ya ragihandinê ku qadeke kêm bû serkeftin û kedeke mezin e. Zimanê kurdî li başûr ji vir çêtir bi pêş ketiye. Hevî dikim û dixwazim ku bi van xebatan wê li Tirkiyeyê jî girîngiya kurdî bê fêmkirin û bi pêş bikeve.”

Osman Ozçelîk jî da xuyakirin ku sektora ragihandinê êdî sînor ji holê rakirine û sînor êdî li ber tunebûnê ne û got kurdiya ku ketiye nêvenga kompîturê li her kesî/ê pîroz be.

Baydemîr got: “Pergala Xebitandinê ya Kurdî gaveke dîrokî ye”

Serokê Şaredariya Bajarê Mezin a Diyarbekirê Osman Baydemîr pergala Xebitandinê ya Kurdî ku ji aliyê Şaredariya Sûrê û Komeleya Pêşxistin û Lêkolîna Çand û Ziman (Karger) ve hatiye amadekirin ji bo zimanê kurdî wek gaveke mezin nirxand û got; divê ku ev pêşketina dîrokî li hember zimanên din wek dijîtiyekê neyê nirxandin. Baydemîr ji bo kesên ku di projeyê de keda wan derbas bûye spasiyên xwe pêşkêş kir. Piştî axaftinan Pergala Xebitandinê ya Kurdî ya bi navê ‘Ubuntu’yê bi sînevîzyonekê hate danasîn û pasta hate belavkirin.

Di sala 2005’ê de dest pê kir

Xebatên amadekirina Pergala Xebitandinê ya Kurdî ya bi navê ‘Ubuntu’yê di sala 2005’e dest pê kir. Ji bo kurdîkirina kompîturê xebatên ku hatin meşandin bi Koma PCkurd a ji aliyê Amed Çeko Jiyan, Elîxan Loran, Erdal Ronahî, Rêzan Tovjîn, Ridvan Bozkurt, Rizoyê Xerzî û Serhat Ronahî ve hatibû damezirandin hat destpêkirin. Piştî biryargirtina pergala xebitandinê bi navê ‘UBUNTU GNU/LİNUX’ê ji bo kurdî hate wergerandin, Ubuntuya kurdî ya yekem 5.04 hate belavkirin. Piştî wê Ubuntu 6.06 hîn zêdetir bi kurdîbûyî hate belavkirin..
 

PÊYWENDÎDAR
Malpera Lînuxa Kurdî
http://www.ubuntu-ku.org/

çavkanî | HAWAR DENGÛBAS